म्याद सक्किएको छ महिना बितिसक्दा पनि कवि पाठक बीमा संस्थान धाउन छोडेनन्

काठमाडौं । सरकारी स्वामित्वको राष्ट्रिय बीमा संस्थानमा पूर्वप्रशासक कविप्रसाद पाठकको तीन बर्षे कार्यकाल सक्किएको छ महिना भइसक्यो । तर अझै पनि उनी कार्यालय आउन छाडेका छैनन् । 

पाठकको म्याद सक्किएपछि अर्थ मन्त्रालयले महेश रिमाललाई निमित्त प्रशासक भनेर तोकेको छ । म्याद सक्किएपछि न संस्थानले उनलाई तलब सुविधा नै दिएको छ । तर पनि पाठक आफूलाई निरन्तरता दिइने आशामा कार्यालय धाउन भने छाडेका छैनन् । म्याद थप नहुँदा पनि कार्यालय आउन नछोडेको देख्दा समितिका कर्मचारीहरु नै आश्चर्यमा परेका छन् । 

‘काम गर्दै गर्नु, पत्र पछि आउँछ’ भन्ने आश्वासनको भरमा सुरुसुरु कार्यालय धाइरहेका पाठकको निरन्तरता अन्योल र विवादित बन्दै आएको छ । यदि निरन्तरता दिने हो भने उनको अघिल्लो कार्यकाल नसक्किँदै अर्थ मन्त्रालयले पत्र दिनुपर्नेमा म्याद सक्किएर विदा भई घर गइसकेको व्यक्ति पुनः म्याद थप हुने आश्वासनको भरमा संस्थान धाउन थालेका थिए । 

त्यसरी ग्याप गरेर म्याद थप्ने कुरा अवैधानिक हुने भन्दै संस्थानकै कर्मचारीले समेत विरोध जनाउन थालेपछि र अर्थ मन्त्रालयमा नयाँ मन्त्री आएपछि उनको निरन्तरता संकटमा परेको हो । कानुनी जटिलताका कारण उनले निरन्तरता पाउने संभावना नहुँदा नहुँदै पनि पाठक कार्यालय आउन भने छोडेका छैनन् । म्याद सक्किएपछि नयाँ नियुक्तिका लागि नयाँ छनौट प्रक्रियामा जानुपर्ने हुन्छ । तर पाठक अझै पनि आफूले निरन्तरताको पत्र पाउने आशामा संस्थान धाइरहेका छन् । 

पाठक दिनभरी आएर प्रशासकको कुर्सीमा बस्छन् । आफूनिकटका कर्मचारीसँग गफ्फििन्छन् र बेलुकी घर फर्किन्छन् । आफ्नो यसअघिको कार्यकालमा संस्थानको लामो समयदेखिको हिसाव किताव मिलान तथा लेखापरीक्षण सम्पन्न गर्न र संस्थान सुधारका लागि कुनै ठोस काम गर्न नसकेर आलोचित भएका उनलाई आफ्नो निरन्तरता प्रतिष्ठाको विषय बनेको छ । 

संस्थानमा आएर के गर्छन् पाठक ?
पाठक संस्थान आउने बस्ने गरे पनि मानसिक रूपमा भने उनी काम गर्न तयार नरहेको संस्थानकै कर्मचारी बताउँछन् । पछिल्लो समय पाठकको रूची कार्यालयको महत्वपूर्ण काममाभन्दा पनि घुमघाममा बढी जाने गरेको छ । 

आफूलाई निरन्तरता दिने आश्वासन दिइएकाले अहिले कार्यालय गए तलब सुविधा पाकिहाल्छ भन्ने मानसिकता पाठकमा देखिन्छ । तर कानुन हेर्दा उनले तलब सुविधा पाउने अवस्था देखिन्छ । यदि दिइएच भने भने निर्णय गर्ने अधिकारीहरु अख्तियार दुरुपयोगमा दण्डित हुनुपर्ने हुन्छ । 

पछिल्लो समय उनी अभिकर्ताको तालिम तथा भ्रमणको नाममा चार दिन पोखरा गएर बसेका थिए । उनको उक्त बसाईसँग संस्थानका कर्मचारीहरू असन्तुष्ट देखिएका छन् । बीमा समितिमा सूर्य सिलवाल अध्यक्ष भएर आएसँगै उनले लेखापरीक्षण र संस्थान सुधारका लागि बढि ताकेता गर्न थालेका छन् 
। 

बीमा समिति, अर्थ मन्त्रालय र बीमा संस्थानकै कर्मचारीहरूबाट उपेक्षित बन्दै गएका पाठकले आफ्नो म्याद थप हुने पक्का भयो भनेपछि प्रतिक्रिया दिँदै भनेका थिए, ‘छायाँमा परेको बीमा संस्थानलाई प्रतिस्पर्धामा जान घचेटिरहें । अब नजिता देखिने गप काम गर्छु ।’