जति सुकै दबाब आए पनि सबै ठाउँमा बजेट नछर्ने सरकारको योजना छः अर्थमन्त्री

काठमाडौं । अर्थमन्त्री डा. प्रकाशशरण महतले स्रोतको सिमितता भएकाले सबै ठाउँमा बजेट नछर्ने बताएका छन् । 

बुधवार प्रतिनिधिसभाको बैठकमा प्रिबजेटमा सांसदहरुले उठाएका प्रश्नहरुको जवाफ दिँदै अर्थमन्त्री महतले सबै ठाउँमा दिएका छौं भनेर कनिका छरे जस्तो गरी बजेट नछर्ने बताए । उहाँले आफूलाई बजेट छर्ने दबाब रहेको भएपनि आफूले त्यस्तो नगर्ने संकेत गरे । र्नुभयो । उहाँले एउटा आर्थिक वर्षमा एउटा काम देखिने गरी गर्नुपर्ने बताए । सरकारसँग स्रोतको सुनिश्चिता नरहेकाले स्रोत सुनिश्चिता अनुसार काम गर्नुपर्ने अवस्था रहेको बताए । 

उनले थोरै साधन र स्रोतले धेरै आवश्यकता र महत्वकांक्षालाई कसरी पूर्ति गर्ने भन्ने चुनौति सरकारलाई रहेको बताए । उनले सांसदहरुबाट समेत योजनाहरु माग भइ आउने र बजेट छर्ने दबाब रहेको उल्लेख गरे । जनताको आवश्यता, बाटो, खानेपानी, शिक्षा स्वास्थ्यको माग गर्नु स्वभाविक भएपनि स्रोतको सिमितता भएकाले 
सबैतिर बजेट नछर्ने सरकारको योजना रहेको बताए । 

उनले सरकारले आगामी बजेटमा जनतामा राज्य प्रतिको भरोसा र भविष् प्रति आशा जगाउनेतर्फ उन्मुख हुनेगरी बजेट ल्याउने प्रतिवद्धता जनाए । वर्तमान समस्या र चुनौति समाधान गरी राज्यप्रति जनताको भरोसा टुट्न नदिन सरकारले गम्भिरताका साथ अग्रसर रहेको बताए । कसिलो राष्ट्र बैंकको मौद्रिक नीति र अर्कोतर्फ सरकारबाट पुँजीगत खर्च हुन नसक्दा अर्थतन्त्रमा शिथिलता आएको दाबी गरे । अर्थतन्त्रलाई चलायमान गराउने उपाय खोज्ने बताए । अर्थतन्त्र चलायमान बनाउन मौद्रिक नीति र वित्त नीतिको तारतम्य एउटै गन्तव्यमा हिँड्नुपर्ने बताए । 

उनले राष्ट्र बैंकले मौद्रिक नीतिलाई खुकुलो बनाउनुपर्ने बताए । पुँजीगत खर्च बढाउन सरकारको स्रोत सिमित रहेको बताए । राज्य प्रणालीमा समस्या भएकाले लक्ष्य अनुसारको पुँजीगत खर्च नभएको भन्दै अब नौ महिनासम्म सुतेर बस्ने प्रचलनको अन्त्य गरिने बताए । 

अर्थमन्त्री डा. महतले सांसदहरुले संसदमा भनेको जस्तो मुलुकको अर्थतन्त्र धराशायी नभएको बताए । उनले मुलुकको अर्थतन्त्र तिब्ररुपमा उकालो लाग्नुपर्ने भएपनि तिब्र रुपमा उकालो लाग्न नसकेको बताए । मुलुकको आर्थिक वृद्धिदर सकारात्मक रहेको दाबी गरे । सरकारको लक्ष्य अनुसार आर्थिक वृद्धि हुन नसकेको आफूले स्वीकार गरेको बताए । सामान्यतया विनियोजित बजेटको सिद्धान्त र प्राथमिकता प्रश्तुत गर्दा अर्थतन्त्रमा यी कमजोरीहरु छन् भनेर विगतमा बजेट प्रश्तुत गर्ने प्रचलन नभएको तर आफूले शुरुवात गरेको बताए । समस्या र चुनौति स्वीकार गरेर अघि बढ्यो भने  मात्रै अर्थतन्त्र ठिक ठाउँमा पुग्ने बताए । उनले ३२ प्रतिशतले राजश्व संकलन बढाउने लक्ष्य लिए पनि त्यो पूरा नभएको बताए । 

सरकारलाई ऋणको दायित्व बढ्दै गएको बताए । अर्थतन्त्रमा देखिएका शिथिलता विदेशी मुद्रालाई व्यवस्थापन गर्नुपर्ने अवस्था रहेको बताए । मुलुक श्रीलंका बन्ने बहस हुँदा त्यसलाई मध्यनजर राखेर मौद्रिक नीति ल्याउँदा र आयातमा प्रतिवन्ध लगाउँदा केही समस्या आएको बताए ।