श्रम विभाग कता छ ? थाहा छैनः श्रममन्त्री

काठमाडौं । श्रम, रोजगार तथा सामाजिक सुरक्षामन्त्री शरतसिंह भण्डारीले श्रम विभाग कमजोर बनेको बताएका छन् । शुक्रवार आयोजित श्रम, रोजगार पत्रकारिता पुरस्कार, २०७९ हस्तान्तरण कार्यक्रममा उनले वैदेशिक श्रमसम्बन्धी सबै कामहरु पहिला श्रम विभागले गर्ने भए पनि अहिले विभाग कमजोर हुँदा मन्त्रालयमा भार परेको बताए । 

भण्डारीले आफैँले बोल्ने वाक्यहरुले आफैँलाई पिरोल्ने गरेको बताए । उनले श्रमको क्षेत्रलाई मर्यादित र सम्मानित बनाउन आवश्यक रहेको बताए । भण्डारीले मुलुकभित्र श्रमका अवसर सिर्जना गर्नेदेखि अन्तर्राष्ट्रिय श्रम बजारसम्म पुग्ने कुरामा नेपालले जोड दिइरहेको बताए । 

भण्डारीले भने, ‘हामीले श्रमको क्षेत्रलाई यसलाई डिग्रिफायर गर्नुपर्छ । मर्यादित, सम्मानित कसरी बनाउने ? यसलाई सुरक्षित कसरी गर्ने ? सरकारले लिएको लक्ष्य र मन्त्रालयको उद्देश्य पनि त्यही नै हो । मुलुकभित्र श्रमका अवसर सिर्जना गर्नेदेखि अन्तर्राष्ट्रिय श्रम बजारसम्म पुग्ने कुरादेखि यदी यसलाई सुव्यवस्थित हिसावले सुरक्षित र भरपर्दो हिसावले इमान्दारीपूर्वक अघि बढाउने हो भने सबैको राम्रो छ । म एउटा कुरा बारम्बार भन्ने गर्छु, अलि चर्को बोल्दिन्छु, त्यसकारण आफ्नो बोलीले आफैँलाई नै बेलाबेलामा अफ्ठ्यारो पार्ने गर्छ । अस्ति मैले कता बोलेँ, मैले के बोलेँ भने यो श्रम तथा रोजगार मन्त्रालय हो, यसले श्रमीकले पाउने सुविधा र समस्या हेर्नुपर्ने हुन्छ तर अहिले मन्त्रालयले धेरै भन्दा धेरै वैदेशिक रोजगारकै मात्रै कुरा गरिरहेका छाँै ।’ 

उनले थपे, ‘मुलुकभित्रको श्रम र श्रमीकको अवस्था के छ ? भन्नेकुरा श्रम विभाग छ, पहिला श्रम विभाग नै थियो, श्रम विभाग अहिले कता छ भनेर मैले त भन्नु हुने की नहुने थाहा छैन, तर कमजोर अवस्थामा छ । त्यसैले मैले यसको नाम नै वैदेशिक मन्त्रालय राखिदिऔँ की क्या हो भनेको, ठूलो अक्षरमा ल मन्त्रीले त वैदेशिक रोजगार मन्त्रालय बनाउन खोज्यो भनियो । बोल्दा धेरै अफ्ठ्यारो हुने गर्दो रहेछ । हामीले अहिले चर्को हिपोक्रेटी कुरा गरेर केही पनि फाइदा छैन । अहिलेको ग्लोवलाइजेशनको फाइदा हामीले लिनुपर्छ । हामीले यसलाई अवसरका रुपमा लिने हो भने देशलाई नयाँ सिराबाट अघि बढाउन सकिन्छ ।’ 

भण्डारीले वैदेशिक रोजगार ऐनलाई परिमार्जन गर्न आवश्यक रहेको उल्लेख गरे । उनले मन्त्रालयले अहिले सोही विषयमा छलफल गरिरहेको छ र १० दिनभित्रमा ऐन परिमार्जनको ड्राफ्ट बनाउने बताए ।