जिल्ला वन अधिकृत सहित १३ जना बिरुद्ध विशेष अदालत काठमाडौंमा डेढ करोडको भ्रष्टाचार मुद्दा

काठमाडौँ । गैरकानूनी रुपमा रुख कटान गरी सार्वजनिक सम्पत्ति हानी नोक्सानी गर्ने जिल्ला वन कार्यालय मकवानपुरका तत्कालीन जिल्ला वन अधिकृत राजेन्द्र न्यौपानेसहित १३ जना बिरुद्ध १ करोड ५२ लाख १९ हजार ३२६ रुपियाँ बिगो कायम गरी विशेष अदालत काठमाडौंमा मुद्दा दायर भएको छ । अख्तियार दुरुपयोग अनुसन्धान आयोगले आइतबार मुद्दा दर्ता गरेको हो ।

जिल्ला वन कार्यालय हेटौडासमेतले गैर कानूनीरुपमा काठ कटान गरी सार्वजनिक सम्पत्ति हानिनोक्सानी गरेको भन्ने उजुरी आयोगमा परेको थियो ।

सोही उजुरीमाथि अनुसन्धान हुँदा तत्कालीन गढी ईलाका वन कार्यालय, मकवानपुर, सेक्टर वन कार्यालय मकवानपुर, जिल्ला वन कार्यालय मकवानपुर, क्षेत्रीय वन निर्देशनालय हेटौडासमेतका कर्मचारीहरु र सेतीदेवी सामुदायिक वन उपभोक्ता समुहका पदाधिकारीहरुको मिलेमतोमा स्वीकृत कार्ययोजना तथा निर्णय विपरीत उक्त वनका हरिया साल तथा अस्ना जातका रुखहरुको हुन आउने परिमाण ९१७८.०९ क्यू फिट काटि बिक्री वितरण गरिएको पाइएको छ ।

नेपाल सरकारलाई हानिनोक्सानी पुर्‍याई भ्रष्टाचार निवारण ऐन, २०५९ बमोजिम भ्रष्टाचारजन्य कसुरमा संलग्न भएको पाइएको हुँदा विशेष अदालत काठमाडौंमा आरोपपत्र दायर गरिएको आयोगका प्रवक्ता प्रदीपकुमार कोइरालाले जनाएका छन् ।