शेयर धितो कर्जा ४० अर्बले बढ्यो, कुन वाणिज्य बैंकबाट कति ? (सूचीसहित)

काठमाडौं । शेयर धितो कर्जामा बैंकहरूको लगानी बढेको छ । तरलता अभावबीच पनि चालू आर्थिक वर्षको पहिलो चौमासमा ४० अर्ब रुपियाँले शेयर कर्जामा बैंकहरूको लगानी बढाएको नेपाल राष्ट्र बैंकले जारी गरेको कात्तिक २०७८ सम्मको तथ्यांकले देखाएको छ ।

तथ्यांक अनुसार चालू आर्थिक वर्षको कात्तिक मसान्तसम्ममा बैैंक तथा वित्तीय संस्थाहरूले शेयर धितोमा गरेको कर्जा लगानी एक खर्ब एक अर्ब ९५ करोड १० लाख रुपियाँ पुगेको छ । यस्तो कर्जा गत वर्षको सोही अवधिमा ६१ अर्ब ३१ करोड रुपियाँ मात्रै थियो ।

यस्तो शेयर धितोमा भएको लगानीमध्ये वाणिज्य बैंकहरूको मात्रै कात्तिकसम्म ८६ अर्ब १५ करोड ९० लाख रुपियाँ रहेको छ । असोजसम्म वाणिज्य बैंकहरूको शेयर कर्जामा लगानी ८८ अर्ब २० करोड ६० लाख रुपियाँ भएको र कात्तिकमा दुई अर्ब रुपियाँले घटेको देखिएको छ ।

गत वर्ष कात्तिकको तुलनामा भने वाणिज्य बैंकहरूले गरेको शेयर कर्जाको यस्तो लगानी ३५ अर्ब ७६ करोड रुपियाँले बढेको पनि राष्ट्र बैंकको तथ्यांकले देखाएको छ । गत वर्ष वाणिज्य बैंकहरूले पहिलो चौमासमा गरेको शेयर धितो कर्जामा भएको यस्तो लगानी ५० अर्ब ३९ करोड १० लाख रुपियाँ रहेको थियो ।

कात्तिकसम्ममा विकास बैंकहरूको शेयर धितोमा गरेको लगानी १२ अर्ब ३५ करोड ८० लाख रहेको छ । गत वर्ष सोही अवधिमा यस्तो लगानी आठ अर्ब ४५ करोड ६० लाख रुपियाँ रहेको पनि तथ्यांकले देखाएको छ ।

फाइनान्स कम्पनीकोले पनि कात्तिकसम्ममा शेयर धितोमा गरेको यस्तो लगानी तीन अर्ब ४३ करोड ३० लाख रुपियाँ रहेको छ । यस्तो लगानी गत वर्ष सोही अवधिमा दुई अर्ब ४६ करोड ६३ लाख रुपियाँ रहेको पनि उल्लेख छ । 

चालू आवको पहिलो चौमासमा शेयर धितोमा लगानी गर्ने वाणिज्य बैंकहरूमध्ये सबैभन्दा बढी ग्लोबल आइएमई बैंकको ७७ अर्ब ८२ करोड रुपियाँ रहेको छ । त्यसपछि धेरै रकम शेयर कर्जामा लगानी गर्नेमा नबिल बैंकको ७२ अर्ब २७ करोड रुपियाँ रहेको छ ।

वाणिज्य बैंकहरूमध्ये सबैभन्दा कम शेयर धितोमा लगानी गर्नेमा कृषि विकास बैंकको सात अर्ब मात्रै रहेको छ । नेपाल एसबीआई र स्याण्टर्ड चार्टर्ड बैंकले भने यस्तो कर्जामा गरेको लगानी सार्वजनिक गरेका छैनन् ।