शुक्रबार १४ बैशाख, २०८१ | Friday Apr 26, 2024
काठमाडौं । नाडा अटोमोबाइल्स एशोशियसन अफ नेपालले आउँदो असोज ६ देखि ९ गतेसम्म भृकुटीमण्डपमा विद्युतीय सवारी साधनहरुको मेला ‘नाडा ईभी एक्स्पो’ आयोजनाको तयारी गरेको छ । नाडाले सोमवार पत्रकार सम्मेलन गरी मेलाको तयारीबारे जानकारी दियो ।
नाडाले विद्युतीय सवारी साधनहरुको मेला पहिलो पटक आयोजना गर्न लागेको हो । मेलामा नेपालमा बिक्री हुँदै आएका अधिकांश विद्युतीय सवारी साधन र तिनका पार्टपूर्जाबारे जानकारी दिने, बिक्री गर्ने गरिन्छ ।
नाडा ईभी एक्स्पोका सभापति अनुप बरालले एक्स्पोमा ५१ वटा स्टल रहने सात वटा ब्राण्डका चार पाङ्ग्रे, १६ ब्राण्डका दुई पाङ्ग्रे, एउटा तीन पाङ्ग्रे तथा तीन ब्राण्डका टायरहरुको प्रदर्शनी हुने बताए ।
नाडाका अध्यक्ष ध्रुव थापाले अहिले ईभी गाडीको माग बढेकोले मेला गर्नु आवश्यकता भएको बताए । उनले नाडाले अटो शो गर्ने सबै प्रक्रिया पूरा गरे पनि सरकारले सवारी साधनको आयात खुला नगरेको कारण अन्तिम समयमा रोक्नुपरेको बताए ।
थापाले अहिले सवारी साधनको आयातमा १० प्रतिशत विद्युतीय सवारी साधनले ओगटेको बताए । अबको पाँच वर्षपछि नेपालमा ५० प्रतिशत विद्युतीय सवारी साधनको बजार हुने उनको विश्वास छ ।
वर्तमान समयमा विद्युतीय सवारी साधनहरुको महत्व र माग दिन प्रतिदिन बढ्दै गएको, यस्ता सवारी साधनको बढ्दो प्रयोगले मुलुकमा उत्पादित जलविद्युतको उपभोग बढ्न गई देशलाई आत्मनिर्भर बनाउनसमेत सहयोग पुग्ने विश्वास आयोजकको छ ।
