आर्थिक मन्दीको ठूलो असर बीमा व्यवसायमा परेको छ, लगानीकर्ता पनि त्रसित छन्ः भट्टराई

काठमाडौं । महालक्ष्मी लाइफ इन्स्योरेन्स कम्पनीका प्रमुख कार्यकारी अधिकृत (सीईओ) रमेशकुमार भट्टराईले पछिल्लो आर्थिक मन्दीको प्रभाव जीवन बीमा व्यवसाय परेको बताएका छन् । 

कर्पोरेट नेपालसँगको कुराकानीमा उनले आर्थिक मन्दीको प्रभावले गर्दा जीवन बीमा व्यवसायमा गिरावट आएको बताएका हुन् । भट्टराईले भने, ‘अरु उद्योग व्यवसाय आर्थिक मन्दीका कारण प्रभावित भए जस्तै बीमा क्षेत्र पनि यसबाट अछुतो छैन् ।’ 

उनले भने, ‘अहिले त मान्छेहरु सबै डराएको अवस्था छ । कहाँ लगानी गर्दा के हुने हो ? त्यसको केही निश्चितता छैन । यसले त विशेषगरी जीवन बीमालाई धेरै ठूलो असर पुर्याएको छ । मेरो अध्ययनबाट पनि जीवन बीमा क्षेत्र अहिले अन्य क्षेत्रको तुलनामा निकै संकटको अवस्थामा छ ।’ 

सीईओ भट्टराईले पछिल्लो समय बीमा व्यवसायकै लागि आफू देश दौडाहामा लागेको बताए । उनले आफू देशका विभिन्न ठाउँमा घुमेको र भोलि नेपालगञ्ज जाने तालिका तय भएको बताए । 

जनतामा एकातिर राजीतिक अन्योलताको अवस्था देख्न सकिन्छ भने अर्को आर्थिक अन्योलता देखिन्छ भन्दै भट्टराईले बलियो सरकार नै अहिलेको आवश्यकता बनेको बताए । बलियो सरकारबाट नै बैंकिङ क्षेत्रसहित समग्र आर्थिक चलायमान हुने उनको विश्लेषण छ । 

भट्टराईले थपे, ‘जबसम्म क्यास फ्लो (नगद प्रवाह) सहज हुँदैन, तबसम्म बीमा व्यवसाय पनि राम्रोसँग अघि बढ्न सक्दैन । यसले गर्दा अहिले स्थिति गाह्रो देखिएको छ ।’ बीमा क्षेत्रमा बजारीकरण गर्ने भनेको अभिकर्ताहरुले नै हो भन्दै उनले यस्तो अवस्थामा अभिकर्ताहरुको मनोबल गिर्न दिन नहुने बताए । आफूहरुले अभिकर्ताका लागि तलिमहरुको समेत आयोजना गरेको भट्टराईले जानकारी दिए । 

अहिलेको विषम अवस्थामा कम्पनीको उच्च तह चुप लागेर बस्ने भन्दा पनि कर्मचारीहरुसँगै गएर समस्या समाधानमा लागिपर्ने बेला रहेको छ भन्दै भट्टराईले आगामी केही समयपछि भने बीमा क्षेत्रले पनि धेरै कर्मचारीहरु माग गर्ने अवस्था आउने विश्वास व्यक्त गरे ।