नेपाली उत्पादनलाई अन्तर्राष्ट्रिय बजारको पहुँच स्थापना गर्ने उद्योगमन्त्रीको पूरानै प्रतिवद्धता

काठमाडौं । उद्योग, वाणिज्य तथा आपूर्तिमन्त्री रमेश रिजालले साना तथा मझौला व्यवसायीको विकास, बिस्तार र प्रवद्र्धनको लागि नीतिगत सुधारसहित अन्तर्राष्ट्रिय बजारको पहुँच स्थापना गर्न सरकार प्रतिवद्ध रहेको बताएका छन् । 

साना तथा मझौला व्यवसायी महासंघको २० औ स्थापना दिवस दिवसको अवसरमा बुधवार आयोजित कार्यक्रममा रिजालले आत्मनिर्भर अर्थतन्त्र निर्माणका लागि साना तथा मझौला उद्योगको विकास, बिस्तार र प्रवद्र्धन गरिनुपर्नेमा सरकार दृढ रहेको बताए । 

उनले एक घर एक व्यवसायको सिद्धान्तलाई मुल नारा बनाएर सामान्य नागरिकलाई पनि उत्पादन तथा सेवामा उत्प्रेरित गरेकोमा महासंघको कार्यप्रति सराहना पनि गरे । रिजालले भने, ‘आत्मनिर्भर अर्थतन्त्र निर्माणका लागि सरकार र निजी क्षेत्रबीच समन्वयात्मक कार्य हुनु जरुरी हुन्छ ।  निजी क्षेत्रमा क्रियाशिल विभिन्न सघ संस्थाहरु जस्तै साना तथा मझौला व्यवसायी महासंघको पनि उद्योग व्यवसाय तथा आर्थिक  विकासको क्षेत्रमा महत्वपूर्ण भुमिका रहेको छ । महासंघले एक घर एक व्यवसायको सिद्धान्तलाई मुल नारा बनाएर सामान्य नागरिकलाई पनि उत्पादन तथा सेवामा उत्प्रेरित गरेको छ । यो अत्यन्तै प्रसंशनीय कार्य हो । नेपालामा साना तथा मझौला व्यवसायीको विकास तथा प्रवद्र्धनको लागि नीतिगत सुधार दक्षता अभिवृद्धि, स्वदेशी वस्तुहरुको प्रवद्र्धन व्यवसायीक वातावरण निर्माण, बजारीकरण तथा अन्तर्राष्ट्रिय बजारसम्मको पहुँच स्थापना गर्ने लगायत विषयमा मन्त्रालयले आफ्नो तर्फबाट प्रभावकारी भूमिका निर्वाह गर्नेमा आश्वस्त दिलाउँछु ।’

कार्यक्रममा व्यवसायीहरुले साना तथा मझौला व्यवसायीद्वारा उत्पादित सामग्री बिक्रीका लागि छुट्टै औद्योगिक ग्रामको व्यवस्था गर्न माग गरेका थिए । महासंघका सहअध्यक्ष इनु पौडेलले आर्थिक क्षेत्रमा आत्मनिर्भर हुनका लागि सरकारले एक घर एक व्यवसायको अभियानलाई जिम्मेवार भई कार्यान्वयन गर्नुपर्ने बताए । 

उनले समृृद्ध नेपाल र सुखी नेपालीको सपना साकार पार्न व्यवसायीक अग्रगामी नेतृत्व र दीर्घकालिन सोचको आवश्यकता रहेको उल्लेख गरे । व्यवसायको सम्मुन्नत प्रवद्र्धनका लागि एसएमई स्कुल, एसएमई उत्पादन संकलन केन्द्र, एसएमई ग्राम र विभिन्न हब सेन्टर लगायतको स्थापना गर्नुपर्नेमा पनि पौडेलले बताए । उनले आर्थिक मन्दीको मारमा साना तथा मझौला व्यवसाय पनि परेकाले मन्दीको प्रभाव न्यूनीकरणका लागि सरकार व्यवसाय र व्यवसायीका लागि विशेष कार्यक्रम ल्याउनुपर्ने बताए । 

साना तथा मझौला व्यवसायमार्फत हरेक घर धुरीमा एक एक जना व्यवसायी निर्माण गर्ने प्रतिवद्धता महासंघले लिएको भएपनि नीतिगत कठिनाई, कच्चा पदार्थको आपूर्ति, व्यवसायीक प्रशिक्षणको कमी तथा बजारीकरणको अभावका कारण अपेक्षित सफलता प्राप्त हुन नसकेको बताए । 

नेपाल हस्तकला महासंघका पूर्वअध्यक्ष धर्मराज शाक्यले साना तथा मझौला व्यवसायीका उत्पादन बिक्रीका लागि छुट्टै औैद्योगिक ग्राम बनाउन सरकारसँग माग गरे । व्यवसायीले कच्चा पदार्थ ल्याउनेदेखि आवश्यक जनशक्ति पनि आफैँ खडा गर्ने गरेको उल्ल्ेख गर्दै व्यवसायको विकास र प्रवद्र्धनका लागि सरकारले प्रशिक्षण, सीप, बजारीकरणसँगै सहज कच्चा पदार्थ आयातको व्यवस्था मिलाउन सरकारसँग माग गरे । 

कार्यक्रममा साना तथा मझौला व्यवसाय प्रवद्र्धनका लागि आ आफ्नो स्थानबाट उत्कृष्ट योगदान पुर्याएका समाजसेवी, व्यवसायी तथा पत्रकारहरुलाई कदर पत्रसहित सम्मान गरियो ।