सेल्सबेरीको महाराजगञ्जमा भव्य डिपार्टमेण्टल स्टोर, भाटभटेनीलाई ओझेलमा पार्ने रणनीति

काठमाडौं । चेन डिपार्टमेण्टल स्टोर सेल्सबेरीले महाराजगञ्जमा अन्तर्राष्ट्रियस्तरको अत्याधुनिक भवनमा सेवा सुरु गरेको छ । विगत ३० बर्षदेखि सेलवेज र १० बर्षदेखि सेल्सबेरी ब्राण्डको आफ्नै भवनमा उच्चस्तरको स्टोर सुरु गरिएको हो । 

सेलवेज ग्रुप अन्तर्गत सेलवेज क्यास एण्ड स्पारी प्रा. लि.ले हाल ३२ वटा शाखा सञ्चालन गर्दै आएको छ । सन २०२६ सम्म १०० बटा शाखा विस्तार गरी दुई हजारलाई रोजगारी दिने लक्ष्य लिएको कम्पनीका अध्यक्ष सुशील प्रधानाङ्गले बताए । 

यस भवनमा बाल मनोरन्जनका सुविधा, स्पा, ज्याकुजी, स्विमिङ पुल तथा विविध स्वदेशी, विदेशी खानाहरुको सेवा सुविधा हुने जनाइएको छ । विश्व स्तरीय रेष्टुरेण्टसहित स्वदेशी एवं अन्तर्राष्ट्रिय गुणस्तरीय सामान उचित मूल्यमा उपलब्ध हुने भन्दै प्रधानाङ्गले अरु र सेल्सबेरीमा मूल्यमा भन्दा पनि अनुभूतिमा फरक महशुल हुने बताए । 

चार तल्ला बेसमेन्ट पार्किङ रहेको यो भवनमा भइँ तल्लादेखि छैठौ तल्लासम्म डिपार्टमेण्टल स्टोर हुने, सात र आठमा कर्पोरेट अफिस हुने, नवौं, दशौं र एघारौंमा जिम, फिटनेस सेन्टर, स्पा तथा स्वदेशी एवं विदेशी खानाहरुको सुविधासहितको रेष्टुरेण्ट र बार हुने र बाह्रौ तल्लामा स्विमिग पुल, ज्याकजी, वियर गार्डन, कफि लाउन्ज तथा इभेन्ट सेन्टर हुनेछ । 

महाराजगञ्जमा यो चेन डिपार्टमेण्टल स्टोर सञ्चालनमा आउँदा स्वदेशी तथा विदेशी पर्यटकहरुको लागि समेत उत्कृष्ट किनामेल गन्त्व्य हुने आशा व्यक्त गर्दै प्रधानाङ्गले सेल्सबेरीको अर्को शाखा कालिमाटीमा सञ्चालन गर्ने तयारी गरिएको बताए । 

सेल्सवेरी टावर तथा कालिमाटी ट्रेड सेन्टरको सुरुवातको अवसरमा कम्पनीले विशेष उपहार योजना पनि ल्याएको छ । उपहारमा विद्युतीय कारसम्म छ । साथै, कम्पनीले यसै आर्थिक बर्षको अन्त्यसम्ममा काठमाडौ तथा पोखरामा थप छ वटा शाखा सञ्चालन गर्ने योजना बनाएको छ । 

अहिले सबैभन्दा ठूलो सुपरस्टोरको रुपमा भाटभटेनी चिनिदै आएकोमा सेल्सबेरीले उसलाई समेत ओझेलमा पार्नेगरी अघि बढ्ने रणनीति बनाएको छ । कम्पनीले हरेक बर्ष सानो तथा ठूलो स्तरको १० देखि १५ वटा शाखा विस्तार गर्ने बताएको छ ।