अर्थमन्त्री-गभर्नर तिक्तता बढ्दै, राष्ट्र बैंकको नियमनप्रति महतले यसरी पोखे आक्रोस

काठमाडौं । अर्थमन्त्री प्रकाशशरण महत र नेपाल राष्ट्र बैंकका गभर्नर महाप्रसाद अधिकारीबीचको मनमुटाव बढ्दै गएको छ । उनीहरुबीचको तिक्तता सतहमा देखिन थालेको छ । 

विगत केही दिनदेखि गभर्नर महाप्रसाद अधिकारीतर्फ लक्षित गर्दै राष्ट्र बैंकको आलोचना गर्दै आएका अर्थमन्त्री महतले मंगलबार पनि कटु आलोचना गरे । उनले राष्ट्र बैंकको नियमनप्रति नै आपत्ति प्रकट गरे । उनले त्यस खालको केही नियमनको सूचना बैंकहरुबाट आफूसम्म आइपुगेको पनि बताए । 

महत नेपाली कांग्रेसका नेता हुन भने अधिकारी तत्कालिन नेकपा एमालेको सरकारको पालामा नियुक्त भएको गभर्नर हुन् । लघुवित्तदेखि सहकारी क्षेत्रमा ठूलो समस्या देखिएको औंल्याउँदै त्यसको नियमन राष्ट्र बैंकले गर्न नसकेको संकेत गरे । उनले ती क्षेत्रमा देखिएको समस्याको समाधान राष्ट्र बैंकले गर्नुपर्ने बताए । 

यसअघि आर्थिक क्षेत्र केही समस्यामा भए पनि अहिले सुधार आउन थालेको दावी गर्दै महतले अहिले महंगी घटेको र मौद्रिक नीति खुकुलो गर्ने बाटो खुलेको बताए । उनले राष्ट्र बैंकको मौद्रिक नीति कडा भएको पनि आरोप लगाउँदै आएका थिए । बैंकहरुले ठूला लगानीकर्तालाई मात्रै हेर्न नहुने बताए । 

उत्पादनशील छेत्रमा बैंकको लगानी बढ्न नसकेको, अनुत्पादक छेत्रमा धेरै लगानी गएको उनले बताए । महतले केही बैंकहरुले गलत गरेको बताए । 

उनले उपभोक्ताको अधिकार र सुरक्षालाई उच्च प्राथमिकतामा राख्नुपर्ने बताए । निजी क्षेत्रका बैंक समेत निक्षेपकर्ताको सुरक्षा के हुने हो ? भन्ने हाहाकारको अवस्था आउँदा पनि त्यसलाई तुरुन्तै पुनर्स्थापना गर्न सफल भएको महतको जिकिर छ । उनले नेपालको वित्तीय क्षेत्रलाई नमुनाको रुपमा अगाडि बढाउन जरूरी रहेको बताए ।

पछिल्लो सुधारिएको सूचकांकले मौद्रिक नीति खुकुलो बनाउन सहयोग गर्ने उनले बताए । महतले मूल्यवृद्धि नियन्त्रण गर्ने मात्र मौद्रिक नीतिको लक्ष्य होइन, समग्र अर्थतन्त्रको स्थायित्व र वृद्धि गराउने पनि लक्ष्य हो भन्दै राष्ट्र बैंकले त्यता ध्यान दिनपर्ने बताए । 

अहिले नेपालमा बैंकर्स र उद्योगी एउटै व्यक्ति हुने प्रवृत्ति रहेको तर संसारमा यस्तो नहुने मन्त्री महतको भनाई थियो । आफ्नै बैंकमा जम्मा भएको पूँजी आफ्नै उद्योगमा लगानी गर्ने परिस्थिति नेपालमा रहेको उनले बताए । महतले आगामी दिनमा त्यसलाई ध्यानमा राखेर लगानीको संरचनालाई परिवर्तन गर्न राष्टं बैंकलाई सुझाव दिए । 

मन्त्री महतले वित्तीय क्षेत्रमा स्वस्थ प्रतिस्पर्धा आवश्यक रहेको बताउँदै वित्तीय संस्थाले सुविधा मात्र नखोजी जिम्मेवारीप्रति कर्तव्यनिष्ठ र स्वनियमनमा बस्न सके अर्थतन्त्र समेत स्वस्थ प्रतिस्पर्धाको बाटोमा जाने बताए । 

उनले ‘आफ्नो हितका लागि मात्र संघसंस्था बनेका होइनन्, हाम्रा सदस्यलाई जिम्मेवार र कर्तव्यनिष्ठ बनाउन हो भनेर संघसंस्था लाग्यो भने यसले सकरात्मक नतिजा दिन्छ’ भन्दै ब्याजदर लगायत अन्य विषयमा मिलोमतोमा निर्धारण हुन थाल्यो भने ढिलोचाँडो त्यसले समस्या सिर्जना गर्ने बताए । 

वित्तीय क्षेत्रमा अस्वस्थ्य प्रतिस्पर्धा बढेको बताउँदै महतले स्वस्थ प्रतिस्पर्धा जरुरी रहेको बताए । २०४६ सालपछि वित्तीय क्षेत्र व्यापक रुपमा विस्तार भएको र बैंकिङ क्षेत्रमा अहिले निजी क्षेत्रको ठूलो उपस्थिति रहेको बताए । तर बैंक र वित्तीय संस्थाहरुले कार्यपद्धति अन्तर्राष्ट्रियस्तरको अपनाउनुपर्ने महतको भनाई छ ।