अहिलेसम्मकै ठूलो अवैध सुन बरामदमा एयरपोर्ट भन्सारका कर्मचारीको मिलेमतो !

काठमाडौं। राजस्व अनुसन्धान विभागले बुधबार बरामद गरेको हालसम्मकै ठूलो अवैध सुन तस्करीमा त्रिभुवन अन्तर्राष्ट्रिय विमानस्थलका भन्सार विभागका कर्मचारीको समेत संलग्नता हुनसक्ने देखिएको छ । 

राजश्व अनुसन्धानको टोलीले विशेष सूचनाको आधारमा ठूलो परिमाणमा सुन पक्रिएपछि त्रिभुवन भन्सारमा कार्यरत भन्सार विभाग, प्रहरी, अध्यागमनको युनिटहरुमाथि गम्भीर प्रश्न उठेको हो । 

तर पछिल्लो पटक राजश्व अनुसन्धानले हस्तक्षेप गर्दा विमानस्थलका अरु युनिटहरुमाथिको विश्वसनियतामाथि प्रश्न उठेको हो । मोटरसाइकल तथा स्कुटरको ब्रेक सु तथा दाह्री काट्ने रेजरमा लुकाएर हङकङबाट तस्करी गरिएको उक्त सुन विमानस्थलस्थित भन्सार कार्यालयअगाडिबाट ट्याक्सीमा लैजान लाग्दा बरामद गरिएको हो । एक सय ६० केजी अवैध सुनबारे राजश्व अनुसन्धानले सुचना पाएपछि उसले हस्तक्षेप गरेर बरामद गरेको थियो । 

ब्रेक सुलको भन्सार जाँचपास एक भन्सार अधिकृत र नायब सुब्बा सहभागी रहेका थिए । यसमा विमानस्थलमा खटिएका प्रहरीहरुको साथ र मौनता देखिन्छ भने पक्राउ परेको सुन परिचित व्यवसायी दीपक मल्होत्राको हुनसक्ने आशंका गरिएको छ । 

त्रिभुवन विमानस्थल भन्सार कार्यालयका एक कर्मचारीले भने ‘मोटरसाइकलको ब्रेक सुल भनि सामान जाँचपास भएको प्रज्ञापन पत्र भेटिएको छ अनुसन्धानलाई सहयोग गर्न हामी तयार छौं ।’

अहिले राजश्व अनुसन्धान विभागले सुन पठाउने र लिनेलाई पक्राउ गर्न टोली परिचालन गरेको छ।प्रहरीले २ जनालाई पक्राउ गरी अनुसन्धान सुरु गरेको छ । अनुसन्धान जारी रहेकाले सुन मल्होत्राको हो वा अरुको हो ? यकिन गरेर भन्न नमिल्ने अनुसन्धान अधिकृतहरुको भनाई छ । 

राजश्व अनुसन्धानका अनुसार रेडी ट्रेडका सञ्चालक दिलीप भुजेल, रामकुमार भुजेल, भन्सार एजेन्ट राजेन्द्र राई र ट्याक्सी चालकलाई पक्राउ गरी अनुसन्धान गरिरहेको छ । विमानस्थल भन्सार कार्यालयअगाडिबाट बा.२च २३२४ नम्बरको ट्याक्सीमा राखेर सुन लैजान लागिएको थियो । मंगलबार साँझ नै सुन बरामद भए पनि गोप्य राखेर बुधबार दिनभरि विभागले अप्रेसन चलाएको हो । सो सुन हङकङबाट क्याथे प्यासिफिकको विमान हुँदै नेपाल भित्रिएको थियो ।