काठमाडौं । चौतर्फी दबाबपछि निजी क्षेत्रको मोवाइल सेवा प्रदायक एनसेलले सरकारलाई नौ अर्ब ९६ करोड ९५ लाख रुपियाँ पुँजीगत लाभकर बुझाएको छ ।
एनसेलले स्वामित्व बिक्रीवापत सरकारलाई तिर्नपर्ने राजश्वमध्य पहिलो किस्ता आइतबार ठूला करदाताको कार्यालयमा बुझाएको हो । आन्तरिक राजश्व विभागका महानिर्देशक चुडामणि शर्माका अनुसार पुँजीगत लाभकरवापत करिव १० अर्ब सरकारलाई बुझाएको छ ।
एनसेलको विदेशी (स्वीडिस) लगानीकर्ता टेलियासोनेरा (हालको टेलिया कम्पनी)ले मलेसियन कम्पनी एक्जियटालाई स्वामित्व बिक्रीवापत लाग्ने ३९ अर्ब भन्दा बढी लाभकर बुझाउनुपर्ने भए पनि अहिले अग्रिम कर कट्टिवापत १५ प्रतिशत रकम बुझाइएको र बाँकी १० प्रतिशत मात्रै बुझाउने तयारी एनसेलले गरेको छ ।
एनसेललाई कर तिराउन चौतर्फी दबाब बढनुका साथै बहिस्कार अभियानसमेत चलेपछि कम्पनी दबाबमा परेको थियो । टेलिया कम्पनीले एक्जियटालाई एनसेलको ८० प्रतिशत स्वामित्व एक अर्ब ३६ करोड ५१ लाख डलरमा एक्जियटालाई बिक्री गरेको थियो ।
सकेसम्म कर नतिर्ने दाउमा रहेको एनसेलको विदेशी लगानीकर्ताको साख नै गिर्ने अवस्था सिर्जना भएपछि कर तिर्न सुरु गरेको हो । उसलाई कर तिर्न सरकारले आज आइतबारसम्मको समय दिएको थियो ।