पुष्पलाल श्रेष्ठका छोरा नै कम्युनिष्ट सरकारदेखि निराश, गरे कडा आलोचना (भिडियो)

काठमाडौं । नेपाल उद्योग बाणिज्य महासंघका उपाध्यक्ष उमेशलाल श्रेष्ठले सरकारको अदूरदर्शी नीतिका कारण अर्थतन्त्र समस्यामा परेको गुनासो गरेका छन् । कर्पोरेट नेपालसँगको कुराकानीमा उनले लकडाउनका कारण अधिकांश उद्योग बन्द प्रायः रहेको र आफूले सञ्चालन गर्दै आएको औषधि उद्योग पनि न्यून क्षमतामा सञ्चालन भइरहेको, न्यून परिमाणमा भइरहेको औषधि बिक्रीवापतको भुक्तानी पनि नउठेको बताउँदै तर धेरै उद्योग व्यवसायको अवस्था भने निकै दयनीय भइसकेको बताए । कम्युनिष्ट पार्टीका संस्थापक नेता पुष्पलाल श्रेष्ठका छोरासमेत रहेका उमेशलालले यस्तो प्रतिकुल अवस्थामा पनि सरकारले अग्रिम कर बुझाउ भन्नु जनतालाई के लाग्यो होला ? भन्दै भने, ‘हामीले अकुत सम्पत्ति कमाएर कहीं लुकाएर राखेको होला, त्यही भएर महंगा गाडी र घरजग्गा बेचेर तिर्न आउँछन् भनेको होला ।’ कोरोना नियन्त्रणमा सरकारको ध्यान जानु सकारात्मक भए पनि अर्थतन्त्रपट्टि ध्यान नजानु दुखदायी कुरा भएको उनको तर्क छ । उनले जुन उद्देश्यले लगाउन लागू गरिएको हो, त्यो असफल भइसकेको भन्दै श्रेष्ठले लकडाउन लागू गर्दा ३–४ जना कोरोना संक्रमित भेटिएकोमा अहिले चार हजार नाघिसकेको औंल्याए ।