सट्टेबाजीमा संलग्न रहेको आरोपमा बल्छी ध्रुबेसहितका कलाकारविरुद्ध करोडौंको मुद्दा दर्ता

काठमाडौं । सट्टेबाजीमा संलग्न रहेको आरोपमा प्रहरीले केही हाँस्य कलाकारहरुविरुद्ध करोडौं रुपियाँको मुद्दा दर्ता गरेको छ । अनलाइन जुवा खेलाउने वानएक्स बेटको प्रचार गरेको अभियोगमा प्रहरीले मरिचमान श्रेष्ठ (बल्छी ध्रुबे), राजु पौडेलसहितका कलाकारहरुविरुद्ध सोमबार जिल्ला अदालत काठमाडौंमा मुद्दा दर्ता भएको हो ।

यस्तो अनलाइन जुवा खेलाउने कार्यमा ई–सेवा, खल्ती जस्ता भुक्तानी सेवा प्रदान गर्ने वालेट कम्पनीहरु पनि संलग्न रहेको देखिएको छ । यसअघि अपराध अनुसन्धान कार्यालय काठमाडौंका प्रमुख मनोज केसीले ई–सेवा लगायतका वालेट कम्पनीहरु वानएक्स बेटको गेटवे रहेको बताएका थिए । 

कर्पोरेट नेपालले लगाताररुपमा वानएक्स बेटको नाममा भइरहेको अवैध अनलाइन जुवा खेलाउने कार्यको समाचारपछि प्रहरीले छानपिन अघि बढाएर कारोबारमा संलग्नदेखि प्रचारप्रचारमा सहयोग गर्ने कालाकारहरुलाई समेत पक्राउ गरेको हो । जिल्ला सरकारी वकिल कार्यालय काठमाडौंले सोमबार कलाकारहरुसहित दिनेश खड्का, अनिता धिताल, जलन घर्तीमगर, अलिश राई गणेश देवकोटा, बेगम नेपाली, रोशन खतिवडा, सरोज घिमिरे विरुद्ध पनि मुद्दा दर्ता गरेको छ । यो मुद्दामा एक जना भने फरार रहेका छन् ।

सरकारी वकिल कार्यालयले उनीहरुलाई नेपाल राष्ट्र बैंक ऐन २०५८ विपरीत कसुर गरेको अभियोग लगाएको छ । उनीहरुविरुद्ध ६४ करोड ९४ लाख २९ हजार रुपियाँ विगो दाबी गरिएको छ । वालेट कम्पनीहरुविरुद्ध प्रहरी मौन बस्न अर्थपूर्ण देखिन्छ । यस अवैध कारोबारमा मुख्य दोषी रहेको ई–सेवामा एक मिडिया सञ्चालकको समेत लगानी छ । प्रहरी कारवाहीबाट जोगिन् उक्त मिडियाका सञ्चालकदेखि ई–सेवाका पदाधिकारीहरु सक्रिय रहँदै आएका थिए ।  

प्रहरीले राष्ट्र बैंक ऐनको दफा ९५ अनुसार उनीहरुसँग विगो जफत गरेर ३ गुणासम्म जरिवाना वा ७ वर्षसम्म कैद वा दुबै सजाय माग दाबी गर्दैगर्दा ठूला अपराधिहरु भने जोगिने अवस्था सिर्जना भएको छ । प्रहरीले यस प्रकरणमा विज्ञापन नियमन गर्ने ऐन २०७६ अनुसार समेत पक्राउ परेकाहरुविरुद्ध मुद्दा चलाएको छ ।