काठमाडौंः परम्परागत रूपमा सञ्चालन हुँदै आएका नेपालका लघु घरेलु तथा साना उद्योगहरूलाई आधुनिक प्रविधिमा अभ्यस्त गराउने मुल उद्देश्यसहित अन्तर्राष्ट्रिय औद्योगिक व्यापार मेला तथा प्रविधि प्रद्धर्शनी आयोजना गरिने भएको छ ।
नेपाल घरेलु तथा साना उद्योग महासंघको आयोजनामा हुँदै आएको यो मेला विगतमा आयोजना हुँदै आएको राष्ट्रिय औद्योगिक प्रद्धर्शनीको तेह्रौं संस्करण हो । यस पटक प्रदर्शनीलाई अन्तर्राष्ट्रिय प्रदर्शनीको रुपमा आयोजना गर्न लागिएको हो ।
महासंघले बुधबार पत्रकार सम्मेलन गरी प्रदर्शनीबारे जानकारी दिएको हो । सम्मेलनमा महासंघका अध्यक्ष श्याम गिरिले नेपालका लघु, घरेलु तथा साना उद्योगहरु परम्परागत सीप र प्रविधिमा निर्भर हुँँदा युवाहरुको आकर्षण यस क्षेत्रमा बढन नसकेको र मुलुकमा पनि खास औद्योगिकीकरणको विकास हुन नसकेको भन्दै यस बर्षको प्रदर्शनीको मुल उद्देश्य सकेसम्म नेपालीहरुले नै विकास गरेको प्रविधिको प्रवद्र्धन र नेपालीलाई उपयुक्त हुनसक्ने विदेशी प्रविधिलाई समेत भित्राउनु रहेको बताए ।
परम्परागत प्रविधिमा निर्भर हुँदा त्यसले राम्रो उत्पादकत्व नदिने भएकाले यस्ता प्रविधिलाई अब संग्रहालयमा राखी नयाँ प्रविधिलाई अपनाउनुको विकल्प नरहेको गिरिको भनाई छ । जसका कारण यस्ता उद्योगहरूको समुचित विकास हुन नसकेको र पुस्ता हस्तान्तरण पनि हुन नसकेर धेरैजसो उद्योगहरू रुग्ण वा बन्द पुगेको उनले बताए ।
अब हाई–टेक साना उद्योग प्रवद्र्धन केन्द्रित कार्यक्रमहरू ल्याउन जरुरी रहेको भन्दै गिरिले यसका लागि सबै क्षेत्रको संयुक्त पहल आवश्यक छ भने । राज्यले नेपालमा विकास भएका प्रविधि र आविश्कारहरुलाई प्रवद्र्धन गर्न नसकेको र त्यस्ता प्रविधिको अभावमा साना उद्योगहरु उठन नसकेको उनको विश्लेषण छ ।
यी दुवै पक्षलाई एकै थलोमा ल्याउने उद्देश्यले बैशाख ७ देखि ११ गतेसम्म काठमाडौको भृकुटीमण्डपमा प्रदर्शनी आयोजना हुन लागेको महासंघको भनाई छ । मेलामा प्रद्धर्शन गर्न लायकका सबै खोज, अनुसन्धान तथा आविष्कारहरूलाई पनि प्रदर्शन गरिने छ ।
यस पटकको प्रदर्शनीमा छिमेकी मुलुक चीन, भारत, बंगलादेश, पाकिस्तान लगायतका मुलुकहरूमा विकास गरिएका प्रविधिहरूलाई पनि सहभागी गराइनेछ । यसबाट नेपालका अनुसन्धानकर्ताहरूलाई थप ज्ञान र सीप प्राप्त हुने विश्वास लिइएको छ ।
औद्योकरणका लागि उपयुक्त हुने प्रविधिका आविष्कारकहरूलाई पुरस्कृत र सम्मान गरिनेछ । विज्ञान तथा प्रविधि मन्त्रालय, उद्योग मन्त्रालय, कृषि मन्त्रालय, राष्ट्रिय विज्ञान तथा प्रविधि प्रज्ञा प्रतिष्ठान, नेपाल कृषि अनुसन्धान परिषद्, रिकास्ट र विश्वविद्यालयहरूसँग सहकार्य गरि गर्न लागिएको यो औद्योगिक व्यापार मेलामा हाम्रा तुलनात्मक लाभका क्षेत्रमा रहेका उद्योगहरूको उत्पादनको प्रदर्शनी र व्यापार समेत गरिनेछ ।
उद्यमी र उद्यमी, अन्वेषणकर्ता र उद्यमीबीच अन्तरक्रिया एवं छलफल, सांस्कृतिक कार्यक्रम र खाद्य महोत्सव प्रदर्शनीका थप आकर्षण हुने गिरिले बताए ।
मुलुकका ७५ जिल्लाबाटै उद्यमीहरू एवं उपयुक्त प्रविधि प्रयोगकर्ता उद्यमीहरू, प्रविधि अन्वेषणकर्ताहरूको सहभागिता रहने प्रदर्शनीमा तीनसय स्टल रहनेछन् भने एक लाख भन्दा बढीले अवलोकन गर्ने अनुमान गरिएको छ ।