काठमाडौंः राजधानीको भृकुटीमण्डपमा चलिरहेको नेपाल १४औं अन्तर्राष्ट्रिय औद्योगिक व्यापार मेला तथा घरेलु उद्योग महोत्सव–२०७५ मा सोमबारसम्म प्रत्यक्ष अप्रत्यक्ष झण्डै १० करोड रुपियाँ बराबरको कारोबार भएको छ ।
सोमबारसम्म मेलामा एक लाख ४० हजार अवलोकनकर्ताले अवलोकन गरेका आयोजक नेपाल घरेलु तथा साना उद्योग महासंघले दावी गरेको छ । मेलामा सोमबार मात्रै तीन करोड रुपियाँको कारोबार भएको जनाइएको छ ।
आज मेलामा पूर्वमन्त्रीहरु अष्टलक्ष्मी शाक्य, सुरेन्द्र पाण्डे, काठमाडौं महानगरपालिकाका मेयर विद्यासुन्दर शाक्य, उपमेयर हरिप्रभा खड्गीलगायतले अवलोकन गरेका थिए । आयात प्रतिस्थापन र निर्यात प्रवद्र्धनका लागि लघु, घरेलु तथा साना उद्योगको विकास गर्ने उद्देश्यले हरेक बर्ष आयोजना गरिने मेला मङ्गलबारसम्म चल्नेछ ।
‘नेपाली वस्तु प्रयोग गरौं, नेपाली भएकोमा गर्व गरौं’ र ‘उद्योग गरौं, उद्यमी बनौं, उठाऔं नेपाल’ भन्ने रहेको यस बर्षको मेलाले मुलुकभरका झण्डै तीन लाख लघु, घरेलु तथा साना उद्योगहरुलाई प्रदर्शनीमार्फत प्रतिबिम्बित गरिएको महासंघका अध्यक्ष श्याम गिरीले बताए ।
प्रदर्शनीमा नेपालका ७५ वटै जिल्लाका उद्यमीहरू, उपयुक्त प्रविधि प्रयोगकर्ताहरू र भारत, पाकिस्तान, बंगलादेशलगायत सार्क मुलुक तथा चीनको सहभागिता रहेको छ । मेलामा २५० वटा स्टल रहेका छन् ।
