शनिबार ५ जेठ, २०८१ | Saturday May 18, 2024
काठमाडौं । नेकपा एकीकृत समाजवादीका सांसद प्रेम आलेले पशुपति क्षेत्रको जग्गा विचौलियाले अपचलन गरेको बताउँदै त्यसलाई वर्तमान संस्कृतिमन्त्री सुदन किरातीले संरक्षण गरेको औंल्याएका छन् ।
बिहीवार संसदमा बोल्दै उनले पशुपति क्षेत्र विकास कोषको जग्गा विचौलियाले अपचलन गर्दा पनि कोषको संरक्षक रहेका मन्त्री र कोषका पदाधिकारी उल्टै विचौलियाको पक्षमा लागेको बताए ।
आलेले पशुपतिको मूर्ति तथा बहुमूल्य सम्पदा चोरिंदा पनि पर्यटन मन्त्री र पदाधिकारी मस्त निद्रामा रहेको आरोप लगाए । उनले गोठाटारको ३१ रोपनी जग्गा विचौलियाले लिएर अपचलन गरेको पनि बताए ।
संस्कृतिमन्त्री समेत भइसकेका आलेले भने, ‘मूर्ति तथा बहुमूल्य सम्पदा चोरिएको छ । कोषको अध्यक्ष मन्त्री र पदाधिकारी मस्त निन्द्रामा छन् । गोठाटारको ५३५ रोपनी जग्गामध्ये ५०४ रोपनी मात्र हालसाबि गरेर ३१ रोपनी जग्गा विचौलियासँगको मिलेमतोमा अपचलन गरी त्यही जग्गा अपचलनमा मुछिएका विचौलियालाई कोषको सदस्यमा नियुक्ति दिइएको छ । गोठाटारको जग्गाको विषयलाई सत्यतथ्य ल्याउने सदस्यलाई हटाउन स्पष्टिकरण सोधिएको छ ।’
सांसद आलेले संस्कृति, पर्यटन तथा नागरिक उडड्यन मन्त्री सुदन किरातीले विगत ३ महिनामा नेपाल वायुसेवा निगमले चार अर्ब नाफा कमायो भनेर झुठो बोलेको बताए । उनले निगमको यथार्थ आर्थिक अवस्थाको बारेमा संसदलाई जानकारी गराउन माग गरे । आलेले थन्किएका जहाजलाई व्यवस्थापन गर्न मन्त्रीलाई चुनौती दिए ।
उनले थपे, ‘यस वर्ष महालेखा प्रतिवेदन र अर्थ मन्त्रालयको आर्थिक सर्वेक्षणमा नेपाल वायुसेवा निगमको घाटा १ अर्ब ७० करोड देखिएको छ । वायुसेवाको कुल ऋण ५० अर्ब नाघिसकेको छ । तर तीन महिनामा निगमले चार अर्ब नाफा कमायो भनि पर्यटन मन्त्रीले सञ्चार माध्यममा झुटो बोलेको सुनियो । के हो यो ? आजको दिनमा जनतालाई भ्रम छर्न पाइँदैन । यो सदनमार्फत निगमको यथार्थ आर्थिक अवस्था कर्मचारी सञ्चय कोष र नागरिक लगानी कोषको लाखौँ बचतकर्तालाई स्पष्ट जानकारी गराइयोस् । दोस्रो चासोको विषय कर्मचारी सञ्चय कोष तथा नागरिक लगानी कोषको ऋण तिरेर तीन वटा जहाज खरिद गर्ने जो कुरा छ, यसमा कुनै सत्यता छैन । सकिन्छ भने पर्यटन मन्त्रीले थन्केका जहाजहरुको व्यवस्थापन गरुन् ।’
आलेले पर्यटनमन्त्री किरातीलाई ‘स्टन्ट’ मन्त्रीको संज्ञा दिए ।
