काठमाडौं। सुन तस्करी काण्डमा आफ्नै पार्टीका साँसदहरुले समेत राजीनामा मागेपछि नैतिक संकटमा परेका अर्थमन्त्री प्रकाशशरण महत बिहीबार बिहानै त्रिभुवन अन्तर्राष्ट्रिय विमानस्थल अनुगमन गर्न पुगेका छन् ।
मन्त्री महतले त्रिवि भन्सार कार्यालयको अनुगमन गर्दै निर्देशनहरु समेत दिएको अर्थ मन्त्रालयका कर्मचारीहरुले जानकारी दिए । भन्सार चेकजाँचबाट एक सय किलोभन्दा धेरै सुन बाहिरिएपछि अर्थमन्त्री महत र गृहमन्त्री नारायणकाजी श्रेष्ठको राजीनामा माग गरिएको छ । संसदमा विक्षी दलहरुले उच्चस्तरीय छानविन समितिको माग पनि गरेका छन् ।
सुन काण्ड बाहिरिएपछि मौन बस्दै आएका महत आज एकाएक विमानस्थल पुग्नुलाई अर्थपूर्णरुपमा हेरिएको छ । केही हप्ताअघि उनले भैरहवा पुगेर आफूले सुनको सुराकी दिनेलाई १० प्रतिशत पुरस्कार दिने व्यवस्था गरेपछि मात्रै सुन समातिएको जिकिर गरेका थिए । तर पछिल्लो घटनामा आफ्नै मन्त्रालय मातहतका कर्मचारी अवैध सुन पास गराएको तथ्यले महतलाई समस्यामा पारेको छ । त्रिवि भन्सारका तीन जना कर्मचारीलाई राजश्व अनुसन्धान विभागले पक्राउ गरी बयान लिइरहेको छ ।
सुन पक्राउ परेलगत्तै राजश्व अनुसन्धान विभागका महानिर्देशक नवराज ढुङ्गाना र पछि गृहमन्त्री नारायणकाजी श्रेष्ठ विमानस्थल पुगेका थिए । भन्सार कार्यालयबाट बदमासी भएको औंल्याउँदै श्रेष्ठले अब विमानस्थलमा प्रहरी चेकजाँच राख्नुपर्ने बताएका थिए ।
आज मन्त्री महतले त्रिवि भन्सारको अनुगमन गरेसँगै दोहोरो चेकजाँचको व्यवस्था गर्न भनेका छन् । भन्सारमा हाल एक मात्रै एक्सरे मेसिन रहेको छ । यस्तो एक्सरे मेसिन दुई वटा राख्न प्रस्ताव गर्न लागिएको हो ।
महतले सुन तथा गलत सामान घोषणा गरी हुने तस्करीलाई रोक्नका लागि योजना बनाउन भन्सार विभागलाई निर्देशन दिएका छन् । विभागले दोहोरो चेकजाँचको मोडलिटीलाई अघि बढाउन लागेको जनाइएको छ । दुई स्थानमा चेकजाँच हुँदा तस्करी कम हुने विभागको तर्क छ ।
अनुगमनमा अर्थसचिव अर्जुन पोख्रेल, राजश्व सचिव रामप्रसाद घिमिरे, भन्सार विभागका महानिर्देशक शोभाकान्त पौडेल पनि सहभागी थिए ।