आइतबार ६ जेठ, २०८१ | Sunday May 19, 2024
काठमाडौं । भूमि व्यवस्था, सहकारी तथा गरिबी निवारण मन्त्री बलराम अधिकारीले सहकारी संस्थाहरुले बैंकभन्दा बढी कारोबार गर्ने प्रतिस्पर्धा गर्दा समस्या सिर्जना भएको तर्क गरेका छन् ।
नेपाल बचत तथा ऋण केन्द्रीय सहकारी संघ (नेफ्स्कून)ले आयोजना गरेको दोस्रो लेखा सुपरीवेक्षण समितिको गोष्ठीमा उनले सहकारीहरु आफ्नो मूल्य मान्यता र सिद्धान्त विपरित अस्वस्थ प्रतिस्पर्धामा लाग्दा समस्या सिर्जना भएको बताए ।
जुन उद्देश्यका साथ सहकारी स्थापना भएको थियो, त्यसको विपरित गर्दै काम भइरहेको धारणा अधिकारीले राखे । उनले भने, ‘सहकारीहरु बैंकभन्दा ठूलो कारोबार गर्ने अभ्यासमा लागे, सहकारीको मूल्य मान्यता विपरित काम गर्न थाले, बचतकर्ताको बचतलाई दुरुपयोग गर्ने अधिकार कसैलाई पनि हुँदैन, सहकारीमा आवद्धहरुले नै समाधान गर्ने हो, सरकारले सल्लाह दिने हो, यो बाटो जाउ भन्ने हो । सरकारले समस्या समाधान गर्ने होइन ।’
सदस्यले पनि सबै कुराको जिम्मा सञ्चालकलाई दिन नहुने मन्त्री अधिकारीले बताए । उनको सुझाव छ, ‘शिक्षक, डाक्टर तथा वकिल सबै यो क्षेत्रमा छन् । सर्वप्रथम मेरो कर्तव्य के हो ? बुझ्नुपर्छ । त्यो बुझ्न सकियो भने यो समस्या आउँदैन ।’
लेखा सुपरिवेक्षण समितिमा पनि खोट रहेको अधिकारीले बताए । उनले सहकारीको समस्या समाधान गर्नका लागि अहिलेदेखि नै लाग्न आवश्यक रहेको बताए ।
