‘त्यो सिगरेट के जातिमा ल्याएको साँढे नौ किलो सुन त गोदामबाटै हरायो रे !’

काठमाडौं । प्रमुख प्रतिपक्ष दल नेकपा (एमाले)का अध्यक्ष केपी ओलीले सरकार आफैंले संसद बैठक चल्न नदिएको आरोप लगाएका छन् । 

ललितपुरमा बुधबार आयोजित एक कार्यक्रममा उनले पछिल्लो सुन तस्करी प्रकरणबारे सांसदहरुलाई बोल्न नदिन सरकारले सभामुखलाई दबाब दिएर संसद बैठक सूचना टाँस गरेर स्थगित गर्न बाध्य बनाएको जिकिर गरे । 

अध्यक्ष ओलीले सरकार आफैँ संलग्न भएकाले सो सुन तस्करी प्रकरणमा आफूहरुले उच्चस्तरीय छानबिन समिति गठन गर्नुपर्ने माग गर्नु परेको तर्क गरे । उनले भने, ‘हामीबाहेक अरुले देश चलाउनै सक्दैन् । सकेन् । दश टाउके हुँदा पनि चलाउन सकेनन् नि । त्यत्रो कोभिड हुँदा पनि हामीले देशलाई तहसनहस हुन दिएनौं ।’ 

ओलीले थपे, ‘छानबिन समिति बनाउन किन मान्दैन् सरकार ? उहाँहरु आफैँ मुछिनु भएको छ । त्यो सिगरेट के जातिमा ल्याएको साँढे नौ किलो सुन जफत गरेर राखिएको थियो । सुन्छु अहिले– त्यो गोदामबाटै हरायो रे । चोरी भयो ।’  

केही बर्षअघि माओवादीका कार्यकर्ताले ट्रली बसको तामाको तार चोरीमा माओवादी संलग्न रहेको औंल्याउँदै उनले भने, ‘अलिक वर्ष अगाडि ट्रली बसेको कार्यालयबाट १३ टन तामाको तार चोरिएको थियो । कत्रो कोट लगाएको आएको थियो होला, त्यत्रो १३ टन तार खोजीमा हालेर चोर्यो होला ? सरकार नलागी चोरियो होला त्यो ? त्यो १३ टन तामाको तार चोरी भएको थियो । ट्रली बस त्यसैगरी सिद्धिएको थियो ।’  

भन्सार कार्यालय जनतालाई दुःख दिन मात्रै राखिएको बताउँदै ओलीले माओवादी नेता कृष्णबहादुर महरा र उनका छोरा संलग्न रहेको भनिएको साढे नौ किलो सुन चोरी भएको कुरा सुन्दा आश्चर्य लागेको बताए । ओलीले भने, ‘बजारको नक्कली इलेक्ट्रिक चुरोट  ल्याएर त्यस ठाउँमा राखिएको छ । केही पनि भेटिँदैन । किनभने सक्कली चोरी भयो । अब प्रधानमन्त्रीजी भन्नु हुन्छ– म छानबिन गरिराखेको छु । गर्न दिनुस् न । हामीलाई छानबिन गर्न किन नदिने ? गर्नुस् तपाईहरु छानबिन । तर तपाईंहरुको छानबिन, तपाईंहरुको सरकार सञ्चालन भरपर्दो भएन् ।’